Slik blir busettinga av flyktningar på Søre Sunnmøre.
645 flykningar skal busettast på Søre Sunnmøre. Slik blir fordelinga blant kommunene.
SØRE SUNNMØRE: 18. mars blei det sendt ut nye oppmodingar frå Integrerings- og mangfoldsdirektoratet (IMDi) til alle kommunene i Noreg. IMDi kom med oppfodring om eit bestemt antal flyktningar til busetting til alle kommunnene. Kommunene hadde frist til å svare på denne oppmodinga 31. mars. Slik ser det ut for kommunene på Søre Sunnmøre.
60 flyktningar til Hareid
På oppmoding frå Integrerings- og mangfaldsdirektoratet (IMDi) vil Hareid kommune busette til saman 60 flyktningar i 2022.
Førebuingane til å møte behova til flyktningar er i gang. Ordføraren i Hareid kommune, Bernt Brandal opplyser om at kommunen førebur seg til på alle område.
– Vi held på å gjere det klart både med husvere i kommunal regi og husrom frå private som vi leiger med. Vi har interne møter og dialogar med barnehagar, skular og helse. Vi innvolverar alle som vil bli innvolvert i det.
Aktuelle sektorar/einingar som vil møte flyktningar stiller seg positive til å kunne hjelpe. Dette melder Hareid kommune på nettsida si.
Ja til 135 flyktningar
Ulstein kommune har vedteke å auke ramma for busetting av flyktningar til til totalt 135 personar i 2022. Dette er i tråd med oppmodinga frå IMDi.
Ulstein kommune påpeikar at busetting av 135 flyktningar er langt meir enn det dei nokon gong har gjort på så kort tid.
– Vi har ikkje den kapasiteten nå, men det er det vi jobbar med nå, fortel Lars Erling Bjåstad Hovlid, einingsleiar for inkludering og mangfald.
– Nå må vi bygge opp igjen
Kommunestyret i Sande kommune har vedteke å busette 50 flyktningar. Dette er i tråd med IMDi si oppmoding til Sande kommune.
Anders Hammer, kommunedirektøren i Sande fortel at det å busette flyktningar kan være utfordrande.
– Dette er ei utfordring fordi vi veit ikkje kven som kjem, når dei kjem, og kva slags behov dei har, seier Hammer.
I tillegg fortel han at Sande kommune har nedskalert flyktningstenesta si over fleire år, fordi Sande er ei lita kommune.
– Nå må vi bygge opp igjen. Vi er i gang med arbeidet, slik at vi skal vere så forberedt som mogleg den dagen det kjem flyktningar som skal busette seg midlertidig i Sande kommune, fortel Hammer.
Mykje privat intiativ
Formannskapet vedtok tysdag 29. mars at Herøy kommune skal ta imot til saman 85 flyktningar i 2022.
Nå førebur kommunen seg knytt opp til dei tenestene som dei skal yte til dei flyktningane som kjem til kommunen.
I tillegg påpeikar kommunalsjef for kultur og oppvekst, Sølvi Lillebø Remøy, at dei har fått mange private som har meldt inn ulike boligar til flyktningane kan bu i.
– Det er mange som har meldt seg med hus og leiligheiter .Vi held på å kartlegge kor store desse husa er og i kva tilstand dei er i, seier Remøy
Oppmoda til å ta i mot 15 flyktningar
Vanylven kommune har blitt oppmoda av IMDi om å busette 15 flyktningar frå Ukraina.
Kommunen har satt i gang arbeidet med å etablere ei flyktningteneste, slik at dei er sikre på at dei kan ta imot flyktningane på ein god måte.
– Det er viktig at Vanylven kommune kan gje flyktningane frå Ukraina gode tenester innanfor helse og oppvekst. Når vi har fått til dette, så kan vi tilby å ta imot fleire flyktningar frå krigsområda i Ukraina, står det på Vanylven kommune si nettside.
Ørsta og Volda tek i mot 150 kvar
På kommunestyremøtet 24. mars blei det avgjort at Ørsta kommune skal busette 150 flyktningar i 2022. Dette er i tråd med oppmodinga dei fekk frå IMDi.
– Det vil påføre alle tenester store utfordringar. Etter kvart vil det også bli eit behov med støtte frå lag og organisasjonar i Ørsta kommune og anna frivilligheit. Dette opplyser Ørsta kommune i eit saksdokument
Den 31. mars hadde Volda kommune eit ekstraordinært kommunestyremøte. Her vedtok dei å ta imot 150 flyktninger iløpet av 2022. Dette er talet som IMDi oppmoda til.
150 flyktningar er langt meir enn det Volda kommune har busett i løpet av eit år. Dette krev at mange kommunale tenester må finne nye løsningar og kapasitet fort å sikre gode tenester.
Volda kommune skriv på sine nettsider at det vil kreve mykje av kommunen å busette 150 flyktningar, men at det er mogleg å få det til.