Nytt skuletilbod på Moltu
Ein gjeng engasjerte foreldre har kjøpt skulebygget på Moltu. Til hausten opnar Moltustranda Montessori.
HERØY: Moltu skule var lenge truga med nedleggjing. Foreldre og føresette til elevane jobba hardt for å behalde det offentlege skuletilbodet. Likevel vedtok kommunen å leggje ned skulen.
Dette fekk småbornsforeldra til å sjå etter andre moglege løysingar. I mars signerte Moltustranda Montessorri og Herøy kommune ein avtale om kjøp av det gamle skulebygget på Moltu.
Montesorriforeldre
Moltustranda Montesorri blir første montesorri-skulen på Søre Sunnmøre. Slike skular fylgjer pedagogikken til Maria Montessori, som i korte trekk betyr at barnet er i sentrum.
Opninga av ein Montessoriskule i bygda kjem etter eit sterkt foreldreinitiativ, fortel Lisa Kristiansen, som sjølv har born på Moltu skule.
– Motivasjonen har jo vore det å behalde ein nærskule. Eit skuletilbod kan vere vesentleg for at folk ynskjer å bli buande og etablera seg i bygda, fortel Kristiansen.
Skambud
Kristiansen og mange fleire laga eit uformelt styre og fekk samla inn midlar for å kjøpe bygget. Etter god dialog med kommunen og godkjenning frå Utdanningsdirektoratet bestemte foreldra seg å leggje inn bud på bygget.
Taksten var på over 1,5 millionar kroner. Det var ikkje i budsjettet deira, fortel Kristiansen.
– So vi la inn eit
skambud på 5000 kroner. Det var ingen andre som la inn bud, so vi fekk det. Vi hadde kjempeflaks, smiler Kristiansen.
Herøy kommune om det nye tilbodet
Kommunestyret i Herøy er positivet til det nye skuletilbodet, fortel Trond Arne Rossi Aglen, kommunedirektør i Herøy kommune. Vidare fortel han at det er ein del vilkår som må følgjast for å drive ein skule. Kommunen skal samarbeide med dei som ynskjer å etablere skulen og passe på at krava blir innfridd.
Aglen legg til at det kjem til å bli færre elevar på den offentlege skulen i Stoksund, men at kommunen skal klare å oppretthalde eit godt tilbod for elevane som går der.
– Eg er glad for at Moltustranda Montesorri har fått løyva til å etablere ein privatskule, kommenterar direktøren.
I videoen ser ein skulebygget og delar av uteområdet.
VIDEO: Mathilde Tønjum
