Vintermoro på Standal

ØRSTA/STANDALEIDET: 13 ungdommar frå 8.–10. trinn samlar seg på Standal 16.–19. februar denne vinterferien. På Kolåstindhytta ventar dagar fylt med skiturar, snøhulegraving og nye vennskap.

– Målet er eigentleg berre at vi skal kose oss. Litt fall og knall i nysnøen er også viktig, seier  miljøterapeut Astrid Nicola Hembre McDonald. Ho er leiar i vinterbasecampen som blir arrangert av Den Norske Turistforening. Måle er å samle friluftsinteresserte ungdommar frå området til ei sosial og lærerik veke i vinterfjellet.

– Det handlar om å skape meistring og fellesskap. Mange av ungdommane kjenner ikkje kvarandre frå før, men det tek som regel ikkje lang tid før dei finn tonen, seier ho.

– Føler eg har kjent dei lenge allereie

For Einar Ulla Hoff (14) er ikkje dette første møte med vinterbasecamp.

– Dette er den fjerde basecampen eg er med på. Eg er også med i Unge naturtalenter i DNT, og håpar å bli ung turleiar etter kvart, fortel han.

Einar har gått i fjellet sidan han var to år gammal, og trivst best ute i naturen.

– Det fine med å vere ung turleiar er at du kan hjelpe folk i naturen. Du lærer å klare deg sjølv, og å hjelpe andre.

Denne veka håpar han å lære endå meir om førstehjelp og overleving.

– Eg vil bli betre på dei tinga. Og så må eg bli flinkare til å ta med ekstra klede. Det er viktig.

Allereie etter éin dag har han fått nye vennskap.

– Imponerande nok føler eg at eg har kjent fleire av dei ganske lenge allereie. Det er veldig kjekt å bli fort god venn med folk.

– Perfekt måte å vere i lag på

Lina Ringstad Aasmo og Oda Ullstein-Vestbøstad og er veninner frå før, og valde å dra saman.

– Vi synest det er veldig gøy å vere ute i lag, og her får vi masse aktivitetar som er arrangerte for oss. Det er eigentleg perfekt, seier dei.

For Oda står ei ny erfaring for tur.

– Eg har aldri prøvd fjellski før, så det blir veldig gøy.

Lina har lang erfaring med friluftsliv og har vore mykje ute i naturen heile livet. I fjor sommar deltok ho på DNT-aktivitetar i fjellet, og trivst godt med å bruke ferien ute.

– Det beste med sånne turar er å møte nye menneske, vere ute i naturen og kose oss.

Så langt har kortspel og aking vore høgdepunkt.

– I går kveld spelte vi kort saman alle, og så aka vi i bakken og fekk skikkeleg fart. Det var veldig, veldig gøy.

Sjølv om det kan vere uvant å bu tett på mange nye menneske, synst dei det har gått bra. 

– Som regel er det veldig hyggelege folk. Då er det null problem å vere så mykje saman.

Aktiv vinterferie

Dagane blir brukte ute på tur, medan kveldane byr på felles middag, spel og sosialt samvær. Deltakarane lærer om trygg ferdsel i vinterfjellet, testar utstyr og får erfaring med både samarbeid og meistring.

For fleire av ungdommane er valet enkelt.

– Vinterferien bør tilbringast på fjellet. Helst med mykje snø, seier dei og smiler.

Og med nysnø i bakkane og latter utanfor hytta, ligg alt til rette for nettopp det.